Нохчийн Республикехь Халкъан Фронтан йукъараллин тергамхоша Нохчийн Республикин автомобилийн некъийн министерствон векалшца цхьаьна хилира «Кхерамза дика некъаш» къоман проектан объектехь, СоьлжаГӀаларчу Короленкон урам тобечу меттехь. Тойечу объектан йохалла – 1 780 метр йу, ткъа майданан тӀехуле – 11 420 йиъкӀов метр. Короленко урам – социальни маьӀне объект йу. Иза №49 йолчу йуккъерчу дешаран школина тӀебоьдуш бу. 2024-чу шарахь цу школина тӀебоьдуш болу кхин цхьа урам а тобан Ӏалашо йу. Дагадоуьйту, 2022-чу шарахь къоман проектан гурашкахь оццу №49 йолчу школина тӀебоьдуш болу Шефски урам тобина хилар. Президентан программица некъан къоман проекто къаьсттина тидам тӀебохуьйту дешаран учрежденешна тӀебоьдуш болчу урамашна. Карарчу хенахь, Короленкон урамехь дӀахьош бу некъа тӀе силам
дилларан белхаш. ДӀахьочу белхашна тӀехь самукъадаларца Ӏуналла до меттигерчу бахархоша. Цара дийцарехь,
царах хӀорамма а дукха ладегӀна хилам бу иза. Силаман белхаш чекхбевллачул тӀаьхьа объектехь 30 некъан хьаьрк дӀахӀотто а, 2 550 метр йохаллехь билгалонаш йахка а, машенаш чехка ца хехкийта некъан пурхалла охьайуьллу хӀума дӀахӀотто а, 2 гӀашлойн дехьаволийла йан Iалашо йу. Йукъараллин тергамхоша билгалдаьккхира объектехь белхаш дика а, билгалйаьхначу хенашца богӀуш а кхочушбеш хилар.
Цара дийцарехь, коьртаниг урамерчу бахархошна аьхна а, кхерамза а дика некъ хилар ду.
2024-чу шарахь къоман проектан гурашкахь Соьлжа-ГӀалахь тобийр бу шайн йукъара йохалла 47,4 км йолу 48
урам. Царах 14 урам гӀалин Висаитовн кӀоштахь бу.
М.АНЗОРОВ